Farg‘onada MIB orqali kelin seplarini qaytarib oldi
Ma’lum bo‘lishicha, bu masala qaynona va kelin o‘rtasida mojarolarga sabab bo‘lib kelgan.
Qo‘shtepa tumanida uzoq vaqt davomida bahslarga sabab bo‘lib kelgan kelin sepi masalasiga qonuniy yechim topildi.
Fuqarolik ishlari bo‘yicha sudning ijro hujjati asosida Majburiy ijro byurosi Qo‘shtepa tuman bo‘limi davlat ijrochilari tomonidan amaliy choralar ko‘rildi. Ijro harakatlari davomida nizoga sabab bo‘lgan sep buyumlari aniqlanib, belgilangan tartibda qonuniy egasiga topshirildi.
Tomonlar o‘rtasidagi kelishmovchiliklar tufayli uzoq vaqt hal etilmay kelgan masala davlat ijrochilarining sa’y-harakati bilan qonuniy tartibda bartaraf etildi. Natijada sud qarori to‘liq ijro qilinib, fuqaroning qonuniy huquqlari tiklandi.
Sep bilan bog‘liq bahslar ko‘pincha oilaviy mojarolarning eng og‘riqli nuqtasiga aylanadi. Qo‘shtepadagi mazkur holatda ham masala sud qarori va ijro harakatlari orqali o‘z yechimini topdi.
