Farg‘onada soliq qarzi sabab korxona binosi xatlandi
Korxonaning soliq qarzi 700 mln so‘mni tashkil etgan.
Majburiy ijro byurosi Farg‘ona shahar bo‘limi ish yurituvida bo‘lgan ijro hujjatlariga asosan, qarzdor “Q.I.” MCHJning davlat byudjeti oldidagi soliq qarzi qariyb 700 million so‘mni tashkil etgan.
Qarzdorlikni ixtiyoriy ravishda to‘lash uchun berilgan imkoniyatdan foydalanilmagani sababli davlat ijrochilari tomonidan majburiy ijro harakatlari o‘tkazildi.
Ijro tadbirlari davomida korxonaga tegishli bino va inshootlar xatlandi, shuningdek, qarzdor tasarrufidagi Damas rusumli avtotransport vositasi ham xatlovga olindi.
Endilikda xatlangan mol-mulklar belgilangan tartibda baholanib, qarzdorlikni qoplash maqsadida realizatsiya qilinishi mumkin.
Mazkur holat davlat byudjeti oldidagi majburiyatlarni o‘z vaqtida bajarmaslik qanday oqibatlarga olib kelishi mumkinligini yana bir bor namoyon etdi.
