Fitch “O‘zbekgidroenergo” reyting prognozini “Ijobiy”ga oshirdi
Kompaniyaning uzoq muddatli xalqaro kredit reytingi “BB” darajasida tasdiqlandi.
Xalqaro reyting agentligi Fitch Ratings “O‘zbekgidroenergo” AJning uzoq muddatli xalqaro kredit reytingini “BB” darajasida tasdiqlab, reyting prognozini “Barqaror”dan “Ijobiy”ga o‘zgartirdi.
Qayd etilishicha, mazkur qaror O‘zbekiston Respublikasining suveren kredit reytingi prognozi ijobiy tomonga qayta ko‘rib chiqilgani bilan bog‘liq. Agentlik mamlakatda amalga oshirilayotgan iqtisodiy islohotlar, makroiqtisodiy barqarorlikni ta’minlash, fiskal intizomni mustahkamlash va investitsion muhitni yaxshilash borasidagi chora-tadbirlarni ijobiy baholagan.
Shu bilan birga, Fitch Ratings “O‘zbekgidroenergo” AJ reytingini baholashda kompaniyaning mamlakat energetika tizimidagi strategik o‘rni, davlat bilan institutsional aloqalari, moliyaviy intizomi, boshqaruv sifati, operatsion barqarorligi va axborot shaffofligi kabi omillarni ham inobatga olgan.
Agentlikka ko‘ra, jamiyatning gidroenergetika sohasidagi muhim vazifalari, barqaror ishlab chiqarish faoliyati, moliyaviy majburiyatlarga mas’uliyatli yondashuvi hamda ehtiyotkorona moliyaviy siyosati uning kredit barqarorligini qo‘llab-quvvatlayotgan asosiy omillar hisoblanadi.
So‘nggi yillarda “O‘zbekgidroenergo” tomonidan gidroenergetika salohiyatini kengaytirish, ishlab chiqarish quvvatlarini modernizatsiya qilish, yangi investitsiya loyihalarini amalga oshirish va boshqaruv tizimini takomillashtirish bo‘yicha tizimli ishlar olib borilmoqda.
Mutaxassislar fikricha, reyting prognozining “Ijobiy”ga o‘zgartirilishi kompaniyaning xalqaro investorlar va moliyaviy institutlar oldidagi ishonchliligini yanada mustahkamlab, yangi investitsiyalarni jalb qilish hamda xalqaro hamkorlikni kengaytirish uchun qo‘shimcha imkoniyatlar yaratadi.
