Mast holda avtomobil boshqarganlarga 15 sutkagacha qamoq jazosi joriy etilishi mumkin
Besh turdagi qo‘pol qoidabuzarlik uchun ma’muriy jazo sifatida transport vositasini vaqtincha olib qo‘yish chorasi taklif etilmoqda.
O‘zbekistonda yo‘l harakati qoidalarini qo‘pol ravishda buzgan haydovchilarga nisbatan javobgarlik choralarini kuchaytirish bo‘yicha qator takliflar ishlab chiqildi.
Yo‘l harakati xavfsizligi xizmati boshlig‘i Sherzod Ibrohimovning ma’lum qilishicha, besh turdagi qo‘pol qoidabuzarlik uchun ma’muriy jazo sifatida transport vositasini vaqtincha olib qo‘yish chorasini joriy etish taklif etilmoqda.
Shuningdek, voyaga yetmagan shaxslarga transport boshqarishga ruxsat berish, noqonuniy poygalar tashkil etish yoki ularda ishtirok etish, yuk avtomobillarini tungi vaqtda yo‘l chetida qoldirish kabi holatlar uchun alohida ma’muriy javobgarlik belgilash nazarda tutilgan.
Takliflarga ko‘ra, transport boshqarish huquqiga ega bo‘lmagan yoki bu huquqdan mahrum etilgan shaxs tomonidan sodir etilgan yo‘l bezoriligi uchun avtomobilni musodara qilish yoki vaqtincha olib qo‘yish chorasi qo‘llanishi mumkin.
Bundan tashqari, transport vositasini mast holda boshqargan shaxslarga nisbatan 15 sutkagacha ma’muriy qamoq jazosi tayinlash ham taklif etilgan.
Yana bir muhim yangilik sifatida, qo‘pol qoidabuzarlik sodir etgan haydovchilar uchun jarimalarni chegirma asosida to‘lash imkoniyatini bir yil muddatga cheklash taklifi ilgari surilgan.
Shuningdek, voyaga yetmagan shaxsga transport boshqarishga ruxsat berish, shuningdek, bunday holatlar natijasida tan jarohati, odam o‘limi yoki boshqa og‘ir oqibatlar kelib chiqqan taqdirda to‘g‘ridan-to‘g‘ri jinoiy javobgarlik joriy etish masalasi ham ko‘rib chiqilmoqda.
