Nukusda Cobalt 190 ta jarimasi uchun qidiruvga berildi
U MIB hamda YXHB hamkorligida o‘tkazilgan tadbir davomida topilib, jarima maydonchasiga joylashtirilgan.
MIB Qoraqalpog‘iston Respublikasi boshqarmasi qidiruv sho‘basi va YHXB xodimlari tomonidan qidiruvdagi avtotransport vositalarini qidirib topish ishlari amalga oshirilmoqda.
Xususan, MIB Qoraqalpog‘iston Respublikasi boshqarmasi ish yurituvida mavjud bo‘lgan sudlarning ijro hujjatlariga asosan, qarzdor J.U.dan jami 116,7 mln so‘mlik 190 ta yo‘l harakati qoidalarini buzganlik uchun solingan jarimalarni undirish belgilangan.
Olib borilgan ijro harakatlari davomida, qarzdorning nomida “Cobalt” rusumli avtomashina mavjudligi aniqlanib, ushbu avtotransport vositasiga nisbatan qidiruv e’lon qilingan.
Majburiy ijro byurosi Qoraqalpog‘iston Respublikasi boshqarmasi qidiruv sho‘basi xodimlari tomonidan joriy yilning 03-iyun kuni o‘tkazilgan tezkor-qidiruv tadbirlaridan birida qarzdorga tegishli avtomashina Nukus ko‘chalarida topilib, jarima maydonchasiga qo‘yilgan.
