Sirdaryoda hokimlik xodimi 50 ming dollar pora bilan ushlandi
Mansabdor fuqaroning ishonchiga kirib, davlat zaxirasidagi yer maydonini ajratib berishni va’da qilgan.
Davlat xavfsizlik xizmati xodimlari tomonidan viloyat prokuraturasi bilan hamkorlikda o‘tkazilgan tezkor tadbir davomida Guliston shahar hokimligining mas’ul xodimi qo‘lga olindi. Bu haqda DXX Zamon.uz'ga xabar berdi.
Aniqlanishicha, u tadbirkorlik faoliyatini yo‘lga qo‘ymoqchi bo‘lgan fuqaroning ishonchiga kirib, shaharning O‘zbekiston shoh ko‘chasida joylashgan va davlat zaxirasida bo‘lgan 2 sotix yer maydonini oziq-ovqat do‘koni tashkil etish uchun mansabdor tanishlari orqali olib berishni va’da qilgan. Buning evaziga esa 50 ming AQSH dollari talab qilgan.
Ma’lum qilinishicha, mansabdor shaxs talab qilingan mablag‘ning bir qismi sifatida fuqaroning “Lasetti” rusumli avtomobilini 12 ming AQSH dollariga baholab, boshqarish huquqini beruvchi ishonchnoma asosida olib qolgan.
Tezkor tadbir davomida u kelishilgan pul mablag‘ining navbatdagi qismi hisoblangan 8 ming AQSH dollarini olayotgan vaqtida ashyoviy dalillar bilan ushlangan.
Hozirda mazkur holat yuzasidan mansabdor shaxsga nisbatan jinoyat ishi qo‘zg‘atilib, unga nisbatan “qamoq” ehtiyot chorasi qo‘llangan. Tergov harakatlari davom ettirilmoqda.
