Toshkent–Andijon va Toshkent–Termiz yo‘nalishlarida tezyurar poyezdlar qatnovi yo‘lga qo‘yiladi
Qatnovlarni tashkil etish maqsadida Koreyadan 8 ta zamonaviy elektropoyezd olib kelinadi.
O‘zbekistonda Toshkent–Andijon hamda Toshkent–Termiz yo‘nalishlarida yuqori tezlikdagi poyezdlar harakatini yo‘lga qo‘yish rejalashtirilmoqda.
Transport vazirligi ma’lumotiga ko‘ra, Koreyada “O‘zbekiston temir yo‘llari” AJ bosh muhandisi Sharofiddin Qodirov, Transport vazirligi vakili Anvar Dushayev hamda Hyundai Rotem prezidenti Li Yong Be o‘rtasida uchrashuv bo‘lib o‘tgan.
Muloqot davomida tomonlar temiryo‘l transporti sohasidagi hamkorlikning bugungi holati va istiqbolli yo‘nalishlarini muhokama qilgan. Xususan, “O‘zbekiston temir yo‘llari” AJ uchun ishlab chiqarilayotgan “Jaloliddin Manguberdi” nomli yuqori tezlikda harakatlanuvchi elektropoyezdni belgilangan muddatlarda yetkazib berish masalalari ko‘rib chiqilgan.
Shuningdek, Toshkent–Andijon va Toshkent–Termiz yo‘nalishlarida yuqori tezlikdagi qatnovlarni tashkil etish maqsadida 8 ta zamonaviy elektropoyezdni yetkazib berish loyihasi yuzasidan texnik shartlarni yakuniy kelishish bilan bog‘liq masalalar batafsil muhokama qilingan.
Uchrashuv yakunida o‘zaro manfaatli hamkorlikni kengaytirish, qo‘shma loyihalarni samarali amalga oshirish hamda temiryo‘l transporti sohasidagi sheriklikni yangi bosqichga olib chiqish bo‘yicha hamkorlikni davom ettirishga kelishib olingan.
