Saida Mirziyoyeva Milliy teatrda “Adolat fasli” spektakli namoyishida ishtirok etdi
Prezident Administratsiyasi rahbari spektaklda bosh rolni ijro etgan Yodgor Sa’diyevni 80 yillik yubileyi bilan tabrikladi.
O‘zbek milliy akademik drama teatrida sahnalashtirilgan “Adolat fasli” spektakli namoyishi bo‘lib o‘tdi. Spektaklni tomosha qilgan Prezident Administratsiyasi rahbari Saida Mirziyoyeva ushbu sahna asari Amir Temur hayotining muhim bir kunini yorituvchi kuchli tarixiy va ma’naviy asar ekanini ta’kidladi.
Asarda Sohibqiron siymosi nafaqat buyuk davlat arbobi va mohir sarkarda, balki yuksak matonat, mustahkam iroda va adolat timsoli sifatida gavdalantirilgani qayd etildi.
Spektaklda bosh rolni O‘zbekiston xalq artisti Yodgor Sa’diyev ijro etdi. Saida Mirziyoyeva san’atkorni yaqinda “Buyuk xizmatlari uchun” ordeni bilan taqdirlangani hamda 80 yillik yubileyi bilan samimiy tabriklab, uning milliy teatr san’ati rivojiga qo‘shgan ulkan hissasini alohida e’tirof etdi.
Shuningdek, sahna asarini yaratgan ijodiy jamoaning mehnati yuqori baholanib, Milliy teatr va unga umrini bag‘ishlagan fidoyi san’atkorlarning salohiyati ushbu spektaklda yana bir bor namoyon bo‘lgani ta’kidlandi.
