Rimda migratsiya masalasi bo‘yicha qarama-qarshi namoyishlar o‘tkazildi
Parlament muhokamasiga kiritilgan “reemigratsiya” tashabbusi fonida o‘tkazilgan aksiyalar davomida xavfsizlikni ta’minlash uchun minglab politsiyachilar safarbar etildi.
Italiya poytaxti Rimda migratsiya siyosati yuzasidan qarama-qarshi pozitsiyadagi minglab fuqarolar ko‘chalarga chiqdi. Bu haqda DW xabar berdi.
Namoyishlarga parlament muhokamasiga kiritilgan va 50 ming imzo to‘plagan “reemigratsiya” to‘g‘risidagi fuqarolik tashabbusi sabab bo‘ldi.
“Remigration and Reconquest” tashabbusi noqonuniy migrantlarni deportatsiya qilish hamda mamlakatga kirish qoidalarini yanada qat’iylashtirishni nazarda tutadi. Ushbu tashabbusni qo‘llab-quvvatlagan namoyishchilar migratsiya siyosatini keskinlashtirish va chet elliklarni mamlakatdan chiqarishni talab qildi. Ayrim ishtirokchilar Mussolini davriga ishora qiluvchi shiorlarni ham ilgari surgan.
Shu bilan birga, Rimning boshqa hududida chap qanot harakatlari va kasaba uyushmalari tomonidan migrantlarni qo‘llab-quvvatlash aksiyasi tashkil etildi. Namoyishchilar ksenofobiya va kamsitishlarga qarshi ekanini bildirib, migrantlar huquqlarini himoya qilishga chaqirdi.
Tartibni saqlash uchun minglab politsiyachilar safarbar etildi. Rasmiylarga ko‘ra, aksiyalar jiddiy to‘qnashuvlar va zo‘ravonliklarsiz yakunlangan.
Migratsiya masalasi Italiya bosh vaziri Jorja Meloni hukumati faoliyatidagi eng dolzarb siyosiy mavzulardan biri bo‘lib qolmoqda.
