Efiopiyada avtobus jarlikka qulashi oqibatida kamida 28 kishi halok bo‘ldi
Jarohatlanganlarning ayrimlari og‘ir ahvolda ekani bildirilmoqda.
Efiopiyaning Amhara mintaqasida yo‘lovchi avtobusi jarlikka qulab tushishi oqibatida kamida 28 kishi halok bo‘ldi, yana bir necha kishi turli darajadagi tan jarohatlari oldi. Bu haqda Reuters xabar berdi.
Ma’lumotlarga ko‘ra, hodisa 15-iyun kuni sodir bo‘lgan. Avtobus Dessi shahridan poytaxt Addis-Abeba tomon harakatlanayotgan vaqtda taxminan 100 metr chuqurlikdagi jarlikka qulab tushgan.
Voqea joyiga qutqaruvchilar va tibbiyot brigadalari zudlik bilan yetib borib, jabrlanganlarga yordam ko‘rsatgan. Jarohatlanganlarning ayrimlari og‘ir ahvolda ekani bildirilmoqda.
Mutasaddilar halokat sabablarini aniqlash bo‘yicha tergov harakatlarini boshlagan.
Ma’lumotlarga ko‘ra, Efiopiyada yo‘l-transport hodisalari tez-tez uchrab turadi. Bunga ayrim hududlarda yo‘l infratuzilmasining talab darajasida emasligi, transport vositalarining texnik holati hamda yo‘l harakati qoidalariga rioya qilinmasligi sabab bo‘layotgani qayd etiladi.
