Endi mahkumlarning kitob mutolaasi test orqali baholanadi
Adabiyotlarni o‘qiganlik darajasini baholash uchun maxsus komissiya tashkil etilib, komissiya yiliga kamida ikki marta test sinovlari natijalarini ko‘rib chiqadi.
Hukumatning 2026-yil 12-iyundagi 307-son qarori bilan jazoni ijro etish muassasalarida mahkumlarning ma’naviy-axloqiy qadriyatlarni shakllantirishga qaratilgan adabiyotlarni o‘qiganlik faktini tasdiqlash bo‘yicha komissiya faoliyatini tashkil etish tartibi tasdiqlandi. Bu haqda Adliya vazirligi xabar berdi.
Yangi nizomga ko‘ra, mahkumlarning adabiyotlarni o‘zlashtirganlik darajasini aniqlash, test sinovlari jarayonini nazorat qilish va natijalarni tasdiqlash maqsadida muassasa xodimlari hamda jamoatchilik vakillaridan iborat komissiya tuziladi.
Komissiya yig‘ilishlari yiliga kamida ikki marotaba — fevral va avgust oylarida o‘tkaziladi. Test natijalari bo‘yicha tayyorlangan xulosa mahkumga imzo evaziga tanishtiriladi va uning shaxsiy yig‘majildiga kiritiladi.
Shuningdek, komissiya xulosasining nusxasi prokurorga yuboriladi. Mahkumning himoyachisi esa o‘z so‘roviga ko‘ra ushbu hujjat nusxasini olishi mumkin.
Nizomga muvofiq, mahkum test natijalari bilan tanishtirilgan kundan boshlab 5 ish kuni ichida test o‘tkazish jarayoni yoki uning natijalari yuzasidan shaxsan o‘zi yoki himoyachisi orqali sudga shikoyat qilish huquqiga ega.
Sud shikoyatni ko‘rib chiqib, dalillar tasdiqlanmasa test natijalarini o‘z kuchida qoldirishi, dalillar asosli deb topilgan taqdirda esa test natijalarini bekor qilish to‘g‘risida qaror qabul qilishi mumkin.
