2035-yilgacha issiqxona gazlari chiqindilarini 50 foizga kamaytirish rejalashtirilmoqda
O‘zbekiston delegatsiyasi Bonndagi FMCP3 sessiyasida milliy iqlim majburiyatlari bo‘yicha erishilgan natijalarni taqdim etdi.
Germaniyaning Bonn shahrida bo‘lib o‘tgan Taraqqiyotni ko‘p tomonlama ko‘rib chiqish bo‘yicha ishchi guruhning uchinchi sessiyasi (FMCP3)da O‘zbekiston delegatsiyasi mamlakatda iqlim o‘zgarishiga qarshi kurash va milliy iqlim majburiyatlarini amalga oshirish bo‘yicha erishilgan natijalarni taqdim etdi.
Milliy iqlim markazi direktori Farrux Sattorov boshchiligidagi delegatsiya BMTning Iqlim o‘zgarishi bo‘yicha Hadli Konvensiyasi doirasidagi Yordamchi organlarning 64-sessiyasi (SB64) tadbirlarida ishtirok etdi.
Sessiyada O‘zbekistonda qayta tiklanuvchi energiya manbalarini rivojlantirish, energiya samaradorligini oshirish, iqtisodiyotning iqlim xavflariga chidamliligini mustahkamlash hamda Parij kelishuvi doirasidagi majburiyatlarni bajarish bo‘yicha amalga oshirilayotgan islohotlar haqida ma’lumot berildi.
Ta’kidlanishicha, yangilangan Milliy miqyosda belgilangan hissa (NDC) dasturiga muvofiq, O‘zbekiston 2035-yilgacha 2010-yilga nisbatan YaIM birligiga to‘g‘ri keladigan issiqxona gazlari chiqindilarini 50 foizga kamaytirishni maqsad qilgan. Shuningdek, iqtisodiyotning uglerod sig‘imini 35 foizga kamaytirish bo‘yicha oldingi maqsad muddatidan avval bajarilgan.
Sessiya davomida mamlakatda quyosh va shamol energetikasi loyihalari hisobiga elektr energiyasi ishlab chiqarish quvvatlarida “yashil” energiya ulushi qariyb 30 foizga yetgani, 2030-yilgacha esa bu ko‘rsatkichni 50 foizdan oshirish rejalashtirilayotgani qayd etildi.
Suv resurslarini tejash borasidagi ishlar ham alohida e’tirof etildi. Suvni tejovchi texnologiyalarni keng joriy etish natijasida har yili qariyb 10 milliard kub metr suv iqtisod qilinayotgani ma’lum qilindi.
O‘zbekiston delegatsiyasi mamlakat bundan buyon ham xalqaro iqlim hamkorligini kengaytirish, iqlim moliyalashtirishini jalb etish va zamonaviy texnologiyalarni joriy etish orqali Parij kelishuvi maqsadlariga erishish yo‘lida faol ishlashini ta’kidladi.
