O‘zbekiston Birinchi xonimi va Albaniya Birinchi xonimi uchrashdi
Armanda Begay Ko‘ksaroydagi uchrashuv doirasida o‘zbek xalqining milliy san’ati, urf-odatlari hamda “Kelin salom” marosimi bilan tanishdi.
Albaniya Respublikasi Prezidenti Bajram Begajning O‘zbekistonga rasmiy tashrifi doirasida Ko‘ksaroy qarorgohida O‘zbekiston Birinchi xonimi Ziroat Mirziyoyeva hamda Albaniya Birinchi xonimi Armanda Begajning uchrashuvi bo‘lib o‘tdi.
Ochiq va samimiy ruhda o‘tgan muloqot chog‘ida tomonlar O‘zbekiston va Albaniya xalqlari o‘rtasidagi do‘stlik hamda o‘zaro anglashuvni mustahkamlash, madaniy-gumanitar hamkorlikni kengaytirish masalalarini muhokama qildi.
Madaniy dastur davomida Armanda Begay o‘zbek amaliy san’ati ustalarining ishlari, jumladan yog‘och o‘ymakorligi, qadimiy so‘zana kashtachiligi va an’anaviy kulolchilik buyumlari bilan tanishdi.
Shuningdek, an’anaviy o‘zbek liboslari namoyishi hamda mamlakatning turli hududlariga xos xususiyatlarni aks ettiruvchi “Kelin salom” marosimi taqdimoti bo'ldi.
Albaniya Birinchi xonimi o‘zbek xalqining milliy an’ana va urf-odatlariga qiziqish bildirib, ularning chuqur tarixiy ildizlari, go‘zalligi va betakrorligini alohida e’tirof etdi.
