O‘zbekistonda 94 turdagi tovar bozorida mahalliy mahsulotlar ulushi past — Raqobat qo‘mitasi
O‘rganilgan 105 ta bozorning 55 tasida to'yinganlik darajasi past ekanligi aniqlandi.
Raqobat qo‘mitasi tomonidan o‘tkazilgan tahlillar natijasida O‘zbekistondagi 94 turdagi tovar bozorida mahalliy mahsulotlar ulushi belgilangan ko‘rsatkichlardan past ekani aniqlandi. Bu haqda Toshkent xalqaro investitsiya forumi doirasida ma’lum qilindi.
Qo‘mita huzuridagi Raqobat siyosati va iste’molchilar huquqlari tadqiqotlari markazi ma’lumotlariga ko‘ra, 2025-yil hamda 2026-yilning dastlabki oylarida o‘tkazilgan o‘rganishlar davomida qator bozorlarda mahalliy ishlab chiqarish ichki talabni to‘liq qoplay olmayotgani qayd etilgan.
Shuningdek, 2026-yil yanvar–fevral oylarida ichki bozorda raqobat muhiti yetarlicha shakllanmagan va talab to‘liq qondirilmagan 20 turdagi mahsulot bo‘yicha alohida tahlillar amalga oshirilgan.
Erkin iqtisodiy zonalardan kelib tushgan murojaatlar asosida o‘rganilgan 105 ta tovar bozorining 55 tasida esa to'yinganlik darajasi past ekanligi aniqlangan.
Mutaxassislar fikricha, mazkur ko‘rsatkichlar ayrim sohalarda ishlab chiqarish hajmlarini oshirish, import o‘rnini bosuvchi mahsulotlar ishlab chiqarishni yo‘lga qo‘yish va yangi investitsiya loyihalarini amalga oshirish uchun qo‘shimcha imkoniyatlar mavjudligini ko‘rsatadi.
