Toshkentda jinoyat ishlarini “hal qilib berish”ni va’da qilgan IIO xodimiga jinoyat ishi ochildi
U restorandagi yong‘in oqibatida ishchi jarohat olgan holat yuzasidan qo‘zg‘atilgan jinoyat ishini tugatib berish uchun pul talab qilgan.
Korrupsiyaga qarshi kurashish yo‘nalishida Davlat xavfsizlik xizmati, Ichki ishlar vazirligi Shaxsiy xavfsizlik bosh boshqarmasi hamda Toshkent shahar prokuraturasi hamkorligida o‘tkazilgan tezkor tadbirda ichki ishlar organlari mansabdor shaxsining noqonuniy harakatlariga chek qo‘yildi. Bu haqda DXX Zamon.uz'ga xabar berdi.
Aniqlanishicha, Shayxontohur tumani IIO FMB TQX Jinoyat qidiruv bo‘limi bo‘linma boshlig‘i o‘zining mansabdor tanishlari orqali tadbirkorlik faoliyati bilan shug‘ullanuvchi fuqaroga nisbatan Jinoyat kodeksining 168-moddasi (firibgarlik) bilan qo‘zg‘atilgan jinoyat ishini ijobiy hal qilib berishni va’da qilgan.
Shuningdek, u tadbirkorga tegishli restoranda sodir bo‘lgan yong‘in oqibatida bir ishchining kuyish jarohati olgani yuzasidan qo‘zg‘atilgan jinoyat ishini tugatib berish evaziga ham pul talab qilgan.
Mansabdor shaxs mazkur masalalarni hal etib berish uchun jami 7 ming 500 AQSH dollari so‘ragan. Tezkor tadbir davomida u oldindan 2 ming 500 AQSH dollarini olgan vaqtida ashyoviy dalillar bilan qo‘lga olingan.
Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
