TXIF-2026 doirasida xalqaro sanoat ko‘rgazmasi o‘z ishini boshladi

 

Toshkent xalqaro investitsiya forumi (TXIF-2026) doirasida CAEx ko‘rgazma majmuasida O‘zbekistonning investitsiyaviy, ishlab chiqarish va eksport salohiyatini namoyish etishga qaratilgan yirik xalqaro sanoat ko‘rgazmasi o‘z ishini boshladi. Bu haqda “Dunyo” AA xabar berdi.

 

Ko‘rgazma forumning markaziy tadbirlaridan biriga aylanib, mamlakatning yetakchi kompaniyalari, tarmoq birlashmalari, davlat idoralari hamda xorijiy hamkorlarni bir maydonga jamlagan. Qariyb 6 ming kvadrat metr maydonda O‘zbekiston iqtisodiyotining asosiy tarmoqlaridagi investitsiya loyihalari va istiqbolli ishlab chiqarish tashabbuslari taqdim etilmoqda.

 

Ekspozitsiyada neft-gaz-kimyo sanoati, mashinasozlik, elektrotexnika, qurilish materiallari, metallurgiya, farmatsevtika, oziq-ovqat sanoati va boshqa yo‘nalishlardagi yutuqlar namoyish etilmoqda. Shuningdek, ishlab chiqarishni mahalliylashtirish, eksport salohiyatini kengaytirish va yangi ish o‘rinlarini yaratishga qaratilgan loyihalarga alohida e’tibor qaratilgan.

 

Ko‘rgazma biznes vakillari, xalqaro moliya institutlari va davlat organlari o‘rtasida to‘g‘ridan-to‘g‘ri muloqot maydoni sifatida ham xizmat qilmoqda. Tadbir davomida qo‘shma loyihalar, investitsiya imkoniyatlari va xalqaro hamkorlikni kengaytirish masalalari muhokama etilmoqda.

 

Forum dasturida panel muhokamalari, tarmoq va hududiy forumlar, investitsiya loyihalari taqdimotlari, pitch-sessiyalar hamda B2B va G2B uchrashuvlari o‘rin olgan. Tadbir yakunida yangi kelishuvlar va shartnomalar imzolanishi kutilmoqda.

 

Ma’lumotlarga ko‘ra, TXIF-2026da 100 dan ortiq mamlakatdan 9 mingdan ziyod delegat, jumladan, xalqaro tashkilotlar va yirik kompaniyalar vakillari ishtirok etmoqda.