Agar memorandum yoqmasa, Eron yana zarba ostida qoladi — Tramp
AQSh prezidenti Eron bilan kelishuv yakuniy emasligini va harbiy javob ehtimoli saqlanib qolishini bildirdi.
AQSh prezidenti Donald Tramp Fransiyada bo‘lib o‘tgan G7 sammiti doirasida agar Eron bilan tuzilgan o‘zaro anglashuv memorandumi shartlari unga ma’qul kelmasa, AQSh harbiy harakatlarni qayta boshlashi mumkinligini ma’lum qildi.
Trampning so‘zlariga ko‘ra, mazkur hujjat yakuniy kelishuv emas va uning bajarilishi qat’iy shartlarga bog‘liq. U, shuningdek, memorandum doirasida Eron bilan sanksiyalarni bekor qilish darhol amalga oshmasligini ta’kidlagan.
“Bu o‘zaro anglashuv memorandumi. Agar menga yoqmasa, biz yana zarba berishga qaytamiz”, — deya uning so‘zlaridan iqtibos keltiradi Reuters.
AQSh prezidenti Eron bilan kelishuv jarayoni hali yakunlanmaganini qayd etib, muzokaralar davom etayotganini bildirgan. Shuningdek, ayrim ommaviy axborot vositalarida Eron uchun katta miqdordagi investitsiya jamg‘armasi tashkil etilgani haqidagi xabarlarni rad etgan.
Avvalroq Tramp Eronning yadroviy dasturi bo‘yicha qat’iy ogohlantirishlar berib, Tehron hech qachon yadro quroliga ega bo‘lmasligini ta’kidlagan edi.
