AQSh Isroilga Eron bilan imzolangan memorandum matnini taqdim etmadi
Netanyaxu Eron bilan erishilgan kelishuvning aniq tafsilotlari Isroilga hali ma’lum emasligini bildirdi.
AQSh ma’muriyati Isroilning Eron bilan erishilgan o‘zaro anglashuv memorandumi matnini taqdim etish haqidagi so‘rovini rad etdi. Bu haqda CNN telekanali Isroildagi manbasiga tayanib xabar berdi.
Manbaga ko‘ra, Vashingtonning asosiy xavotirlaridan biri memorandum mazmuni rasmiy e’lon qilinishidan avval Isroil Bosh vaziri Binyamin Netanyaxu tomonidan oshkor etilishi ehtimoli bilan bog‘liq.
Mazkur ma’lumotni birinchi bo‘lib Isroilning i24 News telekanali e’lon qilgan. Shu bilan birga, AQSh rasmiylaridan biri ushbu xabarni rad etib, Vashington muzokaralar jarayonida mintaqadagi sheriklari, jumladan, Isroil bilan yaqin hamkorlik qilayotganini ta’kidlagan.
Dushanba kuni matbuot anjumani o‘tkazgan Isroil Bosh vaziri Binyamin Netanyaxu Eron bilan memorandum masalasiga deyarli to‘xtalmagan. Keyinchalik jurnalistlar savollariga javob berar ekan, u AQSh prezidenti Donald Tramp bilan barcha masalalarda ham fikrlari bir xil emasligini qayd etgan.
“Biz hali ham ushbu kelishuvning aniq mazmuni qanday bo‘lishini bilmaymiz”, — degan Netanyaxu.
Avvalroq Donald Tramp Eron bilan imzolangan o‘zaro anglashuv memorandumi tafsilotlari yaqin kunlarda jamoatchilikka ma’lum qilinishini bildirgan edi.
