Bolgariyada qiyin vaziyatga tushib qolgan 6 nafar o‘zbekistonlik vatanga qaytarildi
Tegishli idoralar xorijda ish izlayotgan fuqarolarni faqat rasmiy manbalar orqali ishga joylashishga va mehnat shartnomalarini qonuniy rasmiylashtirishga chaqirdi.
Bolgariya Respublikasida murakkab moddiy va ijtimoiy vaziyatga tushib qolgan 6 nafar O‘zbekiston fuqarosi vatanga qaytarildi. Bu haqda Istanbul shahridagi O‘zbekiston Bosh konsulxonasi xabar berdi.
Ma’lum qilinishicha, fuqarolarni qaytarish bo‘yicha zarur konsullik-huquqiy va tashkiliy choralar ko‘rilgan. Natijada ular 16-iyun kuni O‘zbekistonga beg‘araz asosda qaytarilib, oila a’zolari bag‘riga sog‘-salomat yetib borishgan.
Tegishli idoralar xorijga ishlash maqsadida chiqayotgan fuqarolarni ish beruvchi va vositachi tashkilotlar haqidagi ma’lumotlarni oldindan sinchiklab o‘rganish, mehnat shartnomalarini qonunchilik asosida rasmiylashtirish hamda faqat rasmiy va ishonchli manbalar orqali ishga joylashishga chaqirdi.
Ta’kidlanishicha, shubhali takliflarga ishonish va hujjatlarsiz xorijga chiqish fuqarolarni murakkab huquqiy va ijtimoiy muammolarga duchor qilishi mumkin.
