O‘zbekistonda 1-sinfga qabul tizimi onlayn shaklga o‘tkaziladi
Joriy yilda 5 690 ta maktabda birinchi sinfga qabul onlayn shaklda amalga oshiriladi.
2026–2027-o‘quv yili uchun O‘zbekistonda birinchi sinfga qabul jarayonlari bosqichma-bosqich raqamlashtirilmoqda. Joriy yilda mamlakatning 135 ta tuman va shahridagi 5 690 ta umumta’lim maktabida 1-sinfga qabul onlayn shaklda amalga oshiriladi.
Maktabgacha va maktab ta’limi vazirligi ma’lumotlariga ko‘ra, bu respublikadagi barcha umumta’lim muassasalarining qariyb 60 foizini tashkil etadi.
Shuningdek, Toshkent shahri va Buxoro viloyatida 2026–2027-o‘quv yili uchun birinchi sinfga qabul jarayoni to‘liq onlayn formatga o‘tkazildi. Endilikda ushbu hududlardagi ota-onalar ariza topshirish uchun maktablarga shaxsan murojaat qilishlari shart bo‘lmaydi.
Vazirlik ma’lumotiga ko‘ra, 2026–2027-o‘quv yili uchun 1-sinfga qabul jarayonlari 20-iyundan boshlanadi.
