Farg‘onada kelin seplarini MIB orqali qaytarib oldi
Eʼtiborlisi, to‘ydan bir hafta o‘tib oilada nizo boshlangan.
To‘y tantanasi, qarindosh-urug‘lar davrasi, yangi hayotga qadam qo‘ygan yosh kelin… Biroq Beshariq tumanida orzular bilan boshlangan oilaviy hayot kutilmagan nizo bilan davom etdi.
To‘ydan atigi bir hafta o‘tgach, kelinga tegishli bo‘lgan uy-ro‘zg‘or buyumlari, maishiy texnika vositalari va boshqa qimmatbaho seplar masalasi bo‘yicha kelishmovchilik kelib chiqdi. Seplarni qaytarish yuzasidan talablarga qaramay, ularni bermaslik holatlari kuzatildi.
Fuqarolik ishlari bo‘yicha sud tomonidan qabul qilingan qaror ijrosini taʼminlash Byuroning Beshariq tuman bo‘limi davlat ijrochilari zimmasiga yuklatildi.
Olib borilgan ijro harakatlari davomida “bermaymiz” deb turib olingan kelinga tegishli sep jihozlari birma-bir aniqlanib, ro‘yxat asosida qonuniy tartibda olib berildi. Shu tariqa, yosh kelinning mulkiy huquqlari tiklanib, sud qarori to‘liq ijro etildi.
