Farg‘onada soliq qarzi sabab mashinalar xatlanmoqda
Xatlov jarayonlaridan birida transportdan ayrilishni istamagan MCHJ rahbari shu kuniyoq 67 million so‘mdan ortiq qarzni to‘lagan.
Majburiy ijro byurosining Uchko‘prik tuman bo‘limi ish yurituviga qarzdor “H. R.” MCHJdan undiruvchi tuman Davlat soliq inspeksiyasi foydasiga 2026 yil 19 maydagi qarorlarga asosan 2 ta ijro hujjati kelib tushib, shu kunning o‘zida ijro ishi qo‘zg‘atilgan.
Bo‘lim davlat ijrochilari tomonidan olib borilgan ijro harakatlari davomida qarzdor korxonaga tegishli bo‘lgan ikki dona “Isuzu” rusumli yuk avtotransport vositalari qidiruvga berildi.
Olib borilgan qidiruv tadbirlari natijasida mazkur transport vositalaridan biri Qo‘qon shahri hududida, ikkinchisi esa Uchko‘prik tumanida aniqlanib, belgilangan tartibda xatlangan.
Avtotransport vositalaridan ayrilishni istamagan MCHJ rahbari davlat ijrochilari tomonidan olib borilgan tushuntirish ishlaridan so‘ng shu kunning o‘zida qarzdorlikni to‘liq bartaraf etdi.
Natijada undiruvchi foydasiga 63 million qarzdorlik, shuningdek 3 million 191 ming 40 so‘m ijro yig‘imi undirilib, jami 67 million so‘mdan ortiq mablag‘ning ijrosi amalda taʼminlangan.
