Jahon banki vitse-prezidenti Mirzo Ulug‘bek tumaniga tashrif buyurdi
Tashrif Toshkent xalqaro investitsiya forumi doirasida tashkil etildi.
Poytaxtda o‘tkazilayotgan V Toshkent xalqaro investitsiya forumi doirasida xalqaro moliya institutlari va tashkilotlar vakillari O‘zbekistonda amalga oshirilayotgan islohotlar hamda hududlarning ijtimoiy-iqtisodiy rivojlanish jarayonlari bilan yaqindan tanishmoqda.
Shu munosabat bilan 17-iyun kuni Jahon banki vitse-prezidenti Sangbu Kim boshchiligidagi delegatsiya Mirzo Ulug‘bek tumaniga tashrif buyurdi. Mehmonlarni Toshkent shahar hokimi o‘rinbosari Alisher Dusmuxamedov hamda Mirzo Ulug‘bek tumani hokimi Boxodir Gaibnazarov kutib oldi.
Tashrif davomida mehmonlarga tuman hokimligining faoliyati, zamonaviy boshqaruv mexanizmlari, hududni kompleks rivojlantirish bo‘yicha amalga oshirilayotgan loyihalar hamda raqamli transformatsiya jarayonlari haqida batafsil ma’lumot berildi.
Xususan, “Vaziyatlar markazi” faoliyati, uning real vaqt rejimida muammolarni aniqlash va tezkor hal etishdagi o‘rni alohida taqdim etildi.
Xalqaro tashkilot vakillari Mirzo Ulug‘bek tumanida joriy etilgan zamonaviy boshqaruv yondashuvlari, ochiqlik va samaradorlikni ta’minlashga qaratilgan tizimli ishlarni yuqori baholadi. Shuningdek, ular bunday ilg‘or tajribalar hududlarni barqaror rivojlantirish va aholiga ko‘rsatilayotgan xizmatlar sifatini oshirishda muhim ahamiyat kasb etishini ta’kidladilar.
