O‘zbekiston mintaqaning bosh investitsiyaviy markaziga aylanmoqda
V Toshkent xalqaro investitsiya forumida 102 davlatdan 10,6 mingdan ortiq ishtirokchi qatnashdi.
V Toshkent xalqaro investitsiya forumi o‘z miqyosi va nufuzli ishtirokchilari bilan rekord ko‘rsatkichlarni qayd etdi. Joriy yilgi forumda 10 ming 600 nafardan ortiq ishtirokchi qatnashdi. Ularning 4 mingdan ziyodi dunyoning 102 ta davlatidan tashrif buyurgan xorijiy mehmonlar, investorlar va biznes vakillaridan iborat bo‘ldi.
Nufuzli anjumanda Germaniya Prezidenti Frank-Valter Shtaynmayer va Albaniya Prezidenti Bayram Begay, shuningdek, Rossiya, Belarus, Ozarbayjon, Qozog‘iston, Qirg‘iziston hamda Tojikiston hukumat rahbarlari ishtirok etdi.
Forum doirasida Yevropa tiklanish va taraqqiyot banki, Jahon banki, Osiyo taraqqiyot banki, Osiyo infratuzilma investitsiyalari banki, Xalqaro moliya korporatsiyasi, Yangi taraqqiyot banki hamda boshqa yirik xalqaro moliya institutlari va kompaniyalari vakillari ham qatnashdi.
Ta’kidlash joizki, forum ishtirokchilari Toshkentga tashrifini shaxsiy tashabbus asosida amalga oshirdi. Ular transport, mehmonxona va boshqa xarajatlarni mustaqil ravishda qoplagan holda O‘zbekistonga tashrif buyurdi. Bu esa mamlakatning investitsiyaviy jozibadorligi, iqtisodiy salohiyati va barqaror taraqqiyotiga xalqaro biznes hamjamiyatining yuksak ishonchini namoyon etmoqda.
Toshkent xalqaro investitsiya forumi nafaqat yirik kapitalni jalb qilish, balki mintaqaviy hamkorlikni mustahkamlash, yangi iqtisodiy aloqalarni rivojlantirish va xalqaro muloqot uchun muhim platforma sifatidagi ahamiyatini ham yana bir bor tasdiqladi.
