Quvasoyda soliq qarzi evaziga traktor xatlandi
Qarzdor majburiyatni bajarish o‘rniga traktorni bog‘ hududiga yashirib kelgani maʼlum bo‘ldi.
Majburiy ijro byurosi Quvasoy shahar bo‘limi ish yurituviga kelib tushgan ijro hujjatiga asosan, soliq organi foydasiga qarzdor MCHJdan 315 million so‘m soliq qarzdorligini undirish belgilangan.
Biroq qarzdor korxona belgilangan muddatda qarzni ixtiyoriy ravishda to‘lamagan. Ijro harakatlari davomida MCHJga tegishli bo‘lgan “Belarus” rusumli traktorni qo‘shni qishloq hududidagi bog‘ga yashirib qo‘ygani aniqlandi.
Davlat ijrochilari tomonidan olib borilgan qidiruv tadbirlari natijasida yashirilgan texnika topilib, “Belarus” rusumli traktor xatlandi hamda belgilangan tartibda saqlovga olindi.
Hozirda 315 million so‘mlik soliq qarzdorligini undirish yuzasidan majburiy ijro harakatlari davom ettirilmoqda.
