Samarqandda soliq qarzdorligi uchun 2 ta Volkswagen xatlandi
Maʼlum bo‘lishicha, qarzdorlik miqdori 150 mln so‘mdan ortiq bo‘lgan.
Majburiy ijro byurosi Payariq tuman bo‘limi tomonidan soliq qarzdorligini undirishga qaratilgan ijro harakatlari davomida bir kunda ikki nafar qarzdorga tegishli avtotransport vositalari xatlanib, jarima maydonchasiga joylashtirildi.
"V-a SHB" f/x balansida bo‘lgan Volkswagen rusumli avtotransport vositasi soliq qarzdorligi bo‘yicha chiqarilgan qaror ijrosini taʼminlash maqsadida xatlandi. Mazkur qarzdorlikka doir 10 dan ortiq ijro hujjatlari mavjud bo‘lib, qarzdorlik miqdori 112 million so‘mni tashkil etadi.
Shuningdek, Q-v D-d f/x balansidagi Volkswagen rusumli avtomashina ham soliq qarzdorligi sababli jarima maydonchasiga qo‘yildi. Qarzdorga nisbatan 20 ta ijro hujjati mavjud bo‘lib, qarzdorlik summasi 130 million so‘mdan ortiq.
Avtotransport vositalari soliq organlarining soliq qarzdorligini undirish to‘g‘risidagi qarorlari asosida Majburiy ijro byurosi Payariq tuman bo‘limi davlat ijrochilari tomonidan xatlandi va saqlash uchun jarima maydonchasiga joylashtirildi.
Qarzdorlik muddatda qoplanmasa, xatlangan avtomashinalar auksion savdosida sotilib, tushgan mablag‘ qarzdorlikni qoplashga yo‘naltiriladi.
