Toshkent xalqaro moliya markazi to‘g‘risidagi Konstitutsiyaviy qonun qabul qilinadi
O‘zbekiston Iqtisodiy hamkorlik va taraqqiyot tashkilotining Xalqaro investitsiyalar va ko‘p millatli korxonalar to‘g‘risidagi deklaratsiyasiga qo‘shildi.
Xorijiy investorlar kengashining navbatdagi yig‘ilishida Prezident Shavkat Mirziyoyev O‘zbekistonning Iqtisodiy hamkorlik va taraqqiyot tashkilotining Xalqaro investitsiyalar va ko‘p millatli korxonalar to‘g‘risidagi deklaratsiyasiga qo‘shilgani yaqinda e’lon qilinganini qayd etdi.
Davlat rahbarining ta’kidlashicha, mazkur yo‘nalishdagi ishlarning mantiqiy davomi sifatida Toshkent xalqaro moliya markazi to‘g‘risidagi Konstitutsiyaviy qonun qabul qilinishi kutilmoqda.
“Bularning barchasi g‘oyalaringiz amaliyotda izchil tatbiq etilayotganining yorqin dalilidir”, — dedi Prezident.
Qayd etilganidek, o‘tgan davr mobaynida kengash huzuridagi ishchi guruhlar tomonidan investorlar manfaatlariga xizmat qiluvchi 50 dan ortiq samarali uchrashuv tashkil etilgan. Ular doirasida muqobil investitsiya jamg‘armalari, garov qonunchiligi, mas’uliyatli biznes yuritish, professional kadrlar tayyorlash, soliq ma’murchiligi, yer ajratish va energetika kabi ustuvor yo‘nalishlar xorijiy investorlar bilan hamkorlikda batafsil muhokama qilingan.
Joriy yig‘ilishga tayyorgarlik jarayonida 120 ta yangi taklif va tashabbus kelib tushgan. Ular chuqur tahlil qilinib, investitsiya muhitini takomillashtirish, soliq tizimi, kadastr, energetika, moliya va bank tizimi, korporativ boshqaruv, sun’iy intellekt hamda raqamli iqtisodiyot kabi yettita ustuvor yo‘nalishga birlashtirildi.
Prezident ayniqsa valyuta operatsiyalari bo‘yicha monitoring jarayonlarini soddalashtirish, islomiy sug‘urta tizimini joriy etish, “yashil” kreditlar va bank aktivlari bozorini rivojlantirish, shuningdek, korxonalarda ekologik, ijtimoiy mas’uliyat va samarali boshqaruvni nazarda tutuvchi ESG tamoyillarini keng qo‘llash masalalari bugungi kunda alohida ahamiyat kasb etayotganini ta’kidladi.
Shu munosabat bilan har bir yo‘nalish bo‘yicha mas’ullar belgilanib, aniq yechimlar ishlab chiqilishi qayd etildi.
Davlat rahbari ushbu muhim vazifalarni amalga oshirishda faol ishtirok etayotgan ishchi guruhlar hamraislari — “Vision Invest”, “BDO”, “Crowe”, “OTP Group”, “Franklin Templeton”, “Ernst & Young”, “Costa Legal” va “ACWA Power” kompaniyalari rahbarlariga minnatdorlik bildirdi.
