Turkiyalik investorlar Imom Buxoriy boshqaruviga qiziqish bildirmoqda — Jamshid Qo‘chqorov
Turkiyalik investorlar O‘zbekistonda turizm infratuzilmasini rivojlantirish va yangi sayyohlarni jalb etish bo‘yicha strategik hamkor bo‘lishga taklif etildi.
Turkiyalik investorlar Samarqandda joylashgan Imom al-Buxoriy majmuasini boshqarishga qiziqish bildirmoqda. Bu haqda Iqtisodiyot va moliya vaziri Jamshid Qo‘chqorov 16-iyun kuni O‘zbekiston-Turkiya biznes forumida ma’lum qildi.
Biznes uchrashuv Toshkent xalqaro investitsiyalar forumi doirasida tashkil etilgan. “Daryo” nashriga ko‘ra, Jamshid Qo‘chqorov o‘z chiqishida turkiyalik investorlarni qator sohalar bo‘yicha hamkorlikka taklif qildi. Qo‘chqorov O‘zbekistonda sayyohlik yo‘nalishi jadal rivojlanayotganini ta’kidladi.
Unga ko‘ra, yaqinda foydalanishga topshirilgan Islom sivilizatsiyasi markazi, Imom Buxoriy va Imom Moturidiy majmualari ziyorat, madaniy- ma’rifiy turizm markazlariga aylanishiga ishonch bildirildi.
“O‘zbekiston va Turkiya o‘rtasida turizm sohasida katta salohiyat mavjud. Biz turkiyalik biznes vakillarini sayyohlik yo‘nalishida qo‘shma marketing dasturlarini amalga oshirishga, mehmonxona va servis infratuzilmasini rivojlantirish, Turkiya va uchinchi davlatlardan sayyohlar oqimini ko‘paytirish bo‘yicha strategik hamkor bo‘lishga taklif etamiz. Samarqand shahrining yaqinida joylashgan Imom Buxoriy ziyorat majmuasini boshqaruvga olish masalasi yuzasidan turk investorlari tomonidan katta qiziqish bildirilmoqda”, — degan vazir.
Mazkur forum doirasida 18-iyun kuni turizmga bag‘ishlangan panel yig‘ilishidan so‘ng Turizm qo‘mitasi raisi Abdulaziz Aqqluov jurnalistlarga Imom Buxoriy majmuasi atrofidagi 24 ta mehmonxona xorijiy investorlarga ijaraga berilayotganini ma’lum qildi.
Uning aytishicha, mazkur mehmonxonalar 2 yilga investorlarga ijaraga beriladi. 3 yildan boshlab o‘zaro mehmonxona egalari bilan birgalikda umumiy marketing choralarni birgalikda ko‘rib chiqadi.Aqqulov hamkor tomon majburiyatlaridan 24 ta mehmonxonaga turli musulmon davlatlardan mehmonxona brendlarini jalb qilish va ularni targ‘ib qilishi kerakligini aytdi.
Qo‘mita raisi , 15-16-iyun kunlari “Ratan” mehmonxonalari majmuasi rahbari Toshkent va Samarqandga kelib mehmonxonalarni ko‘zdan kechirib, baholash jarayonlarini o‘tkazib ketishgan. Iyul oyida o‘zlarini inspeksiyalari bilan tekshiruv ishlarini amalga oshirishini ma’lum qildi.
Unga ko‘ra, “Ratan” mehmonxonasi vakillari O‘zbekistondagi 2-3 ta xususiy mehmonxona vakillari bilan kelishuvga erishgan.
