Bolalarni tashish qoidalarini buzganlar 15 sutkagacha qamalishi mumkin
O‘zbekistonda bolalarni tashish qoidalarini buzganlik uchun 30 BHM miqdorida jarima va haydovchilik huquqidan mahrum qilish taklif etildi.
Ma’muriy javobgarlik to‘g‘risidagi kodeksga bolalarni tashish va bolalarni tashishni tashkil etish qoidalarini buzganlik uchun alohida javobgarlik belgilashni nazarda tutuvchi qonun loyihasi jamoatchilik muhokamasiga taqdim etildi.
Qonun loyihasiga ko‘ra, kodeks 128-11-modda bilan to‘ldirilishi rejalashtirilgan.
Unga muvofiq, bolalarni tashish qoidalarini buzgan haydovchilarga 30 BHM miqdorida jarima solish hamda ularni bir yildan uch yilgacha transport vositasini boshqarish huquqidan mahrum qilish taklif etilmoqda.
Agar ushbu qoidabuzarlik transport vositasini boshqarish huquqiga ega bo‘lmagan yoki haydovchilik huquqidan mahrum qilingan shaxs tomonidan sodir etilsa, 50 BHM miqdorida jarima yoki 15 sutkagacha ma’muriy qamoq jazosi qo‘llanishi mumkin.
Shuningdek, bolalarni tashishni tashkil etish qoidalarini buzganlik uchun ham 30 BHM miqdorida jarima joriy etilishi taklif etilgan. Mazkur huquqbuzarlik ma’muriy jazo qo‘llanilganidan keyin bir yil ichida takroran sodir etilsa, jarima miqdori 50 BHMgacha oshiriladi.
