Eron JCHdagi cheklovlar sabab FIFAga shikoyat qildi
Eron tomoni noroziligi AQSh hududiga kirish va tayyorgarlik mashg‘ulotlari uchun belgilangan vaqt cheklovlariga qaratilgan.
Eron futbol federatsiyasi (FFIRI) 2026-yilgi FIFA Jahon chempionatiga tayyorgarlik jarayonida milliy terma jamoaga qo‘yilgan ayrim tashkiliy cheklovlar yuzasidan FIFAga rasmiy shikoyat yuborishini ma’lum qildi. Bu haqda The Telegraph jurnalisti Jeyms Daker FFIRI bayonotiga tayanib xabar berdi.
Federatsiya vakillarining bildirishicha, asosiy norozilik Eron terma jamoasiga AQSh hududiga kirish va mashg‘ulot jarayonlarini tashkil etish bo‘yicha qo‘yilgan vaqt cheklovlari bilan bog‘liq. Xususan, jamoaga Belgiyaga qarshi o‘yin o‘tkaziladigan Los-Anjelesga faqat o‘yin arafasida kirishga ruxsat berilgani tanqid qilinmoqda.
FFIRI bunday qarorlar barcha ishtirokchi jamoalar uchun teng sharoit tamoyiliga zid ekanini va bu holat terma jamoaning tayyorgarlik jarayoniga salbiy ta’sir ko‘rsatishini ta’kidlagan.
Shuningdek, Eron tomoni avvalroq Meksikaning Tixuana shahridagi mashg‘ulot bazasidan AQShga ikki kun oldin yetib borish rejasini ilgari surgan, biroq bu taklif rad etilgani ham ma’lum qilingan.
Federatsiya mazkur vaziyat yuzasidan FIFAga tegishli tartibda rasmiy shikoyat yuborilishini va masala xalqaro futbol tashkiloti doirasida ko‘rib chiqilishini bildirgan.
