Japarovga yana 8–10 yil imkoniyat berish kerak — Asqar Akayev
Qirg‘iziston sobiq prezidenti mamlakatning barqaror rivoji uchun prezident vakolat muddatinini uzaytirish zarurligini ta’kidladi.
Qirg‘iziston Prezidenti Sadir Japarov hamda bir qator xorijiy mehmonlar, shuningdek sobiq davlat rahbarlari — Asqar Akayev va Sooronbay Jeenbekov ishtirokida Cholpon-Ota shahrida Issiqko‘l xalqaro forumi o‘tkazilmoqda.
Forum doirasida so‘zga chiqqan Qirg‘izistonning birinchi prezidenti Asqar Akayev Issiqko‘l forumi 1980-yillarda yozuvchi Chingiz Aytmatov tashabbusi bilan tashkil etilganini va bugungi kunga kelib xalqaro miqyosdagi muhim muloqot maydoniga aylanganini ta’kidlagan.
U o‘z nutqida dunyoda, xususan Sharq davlatlari va AQSh o‘rtasida kuchayib borayotgan keskinlikdan xavotir bildirib, zamonaviy geosiyosiy vaziyat va sun’iy intellekt bilan bog‘liq xavflar haqida ham to‘xtalib o‘tgan.
Shuningdek, Asqar Akayev Qirg‘iziston Prezidenti Sadir Japarovning faoliyatiga baho berar ekan, mamlakatda iqtisodiy o‘sish va ijtimoiy barqarorlik kuzatilayotganini qayd etgan. U bu jarayonlarni “Qirg‘iziston iqtisodiy mo‘jizasi” sifatida ta’riflagan.
Nutqi davomida Akayev qirg‘iz xalqiga murojaat qilib, agar amaldagi prezidentga mamlakat iqtisodiy rivojini davom ettirish uchun qo‘shimcha vakolat berilsa, bu uzoq muddatli barqarorlik va taraqqiyotga xizmat qilishini bildirgan. U bunday vakolat 8–10 yil davom etishi mumkinligini ham tilga olgan.
