Margʻilondagi xonadonlardan birida yongʻin sodir boʻldi
Yongʻin natijasida ishlab chiqarish sexi va chinni buyumlar saqlash omborxonasi ham zarar koʻrgan.
Favqulodda vaziyatlar vazirligi xabariga koʻra, 18-iyun kuni soat 15:36 da Margʻilon shahri, “Tuyagum” MFY, Oydin koʻchasida joylashgan xonadonlardan birida yongʻin sodir boʻlgan.
Voqea joyiga 8 ta qutqaruv boʻlinmasi soat 15:41 da yetib borgan. Tezkor harakatlar natijasida yongʻin soat 16:00 da oʻrab olingan va 16:20 da toʻliq oʻchirilgan.
Yongʻin oqibatida xonadonning 120 kv.m maydoni, unga tutash boʻlgan poyabzal ishlab chiqarish sexining 120 kv.m qismi hamda chinni buyumlar saqlash omborxonasining 60 kv.m maydoni, jumladan tomi, ichki qismi va mahsulotlari zarar koʻrgan.
Shuningdek, binolarning 200 kv.m maydoni saqlab qolingan. Hodisa oqibatida tan jarohati olganlar qayd etilmagan.
Ayni paytda yongʻinning kelib chiqish sababi hamda moddiy zarar miqdori aniqlanmoqda.
