O‘zbekiston va Xitoy cho‘llanishga qarshi kurash bo‘yicha yangi hamkorlik bitimlarini imzoladi

 

Xitoyning Inchuan shahrida bo‘lib o‘tayotgan “Cho‘llanishga qarshi kurashish yo‘nalishida Xitoy – Markaziy Osiyo hamkorligi” xalqaro konferensiyasi doirasida Ekologiya va iqlim o‘zgarishi milliy qo‘mitasi huzuridagi O‘rmon agentligi delegatsiyasi xitoylik hamkorlar bilan ikki muhim hamkorlik bitimini imzoladi.

 

Dastlab, O‘rmon agentligi direktori Erkin Muhiddinov hamda Xitoyning Ningxua o‘rmon xo‘jaligi va yaylovlar boshqarmasi rahbari Vu Syaruy o‘rtasida hamkorlik bitimi imzolandi. Mazkur hujjat ihota o‘rmonlari barpo etish, hududlarning yashillik darajasini oshirish, zamonaviy ko‘chatxonalar va onalik plantatsiyalarini tashkil etish, barqaror o‘rmon xo‘jaligi hamda yashil sanoatni rivojlantirishga qaratilgan qo‘shma loyihalarni amalga oshirishni nazarda tutadi.

 

Shuningdek, tomonlar suv resurslaridan oqilona foydalanish, degradatsiyaga uchragan yerlarni tiklash, tuproq sho‘rlanishining oldini olish hamda ekotizimlarni bosqichma-bosqich mustahkamlash yo‘nalishlarida ham hamkorlikni yo‘lga qo‘yishga kelishib oldilar.

 

Konferensiya doirasida O‘rmon agentligi va Xitoyning “Yinchuan Wolsenn Modern Irrigation Co., Ltd” kompaniyasi o‘rtasida ham alohida hamkorlik bitimi imzolandi. Unga ko‘ra, xitoylik hamkorlar O‘zbekistonga suvni tejovchi zamonaviy sug‘orish texnologiyalari — fertigatsiya namoyish tizimlarini yetkazib beradi hamda mahalliy mutaxassislar uchun muntazam o‘quv dasturlarini tashkil etadi. Loyihaning umumiy qiymati qariyb 110 ming yuanga teng.

 

Mutaxassislarning ta’kidlashicha, fertigatsiya texnologiyasi sug‘orish suvi bilan birga mineral o‘g‘itlarni ham o‘simlik ildiziga bevosita yetkazib berishga xizmat qiladi. Ushbu usul o‘g‘it sarfini 20–50 foizgacha qisqartirish, suvdan samarali foydalanish va mehnat unumdorligini oshirish imkonini beradi.

 

Ta’kidlanishicha, mazkur zamonaviy texnologiyalarning joriy etilishi mamlakatimizda yangi o‘rmonzorlar barpo etish va cho‘llanishga qarshi kurash tadbirlarining samaradorligini sezilarli darajada oshiradi.

 

Ma’lumot uchun, 2025-yilda O‘zbekiston va Xitoy hamkorligi doirasida Arnasoy, Karmana, Muborak, Qorako‘l va Nukus tumanlarida galofit o‘simliklari bog‘lari tashkil etilgan. Mamlakatimizga Xitoydan 1,4 ming tonna galofit o‘simliklari urug‘lari olib kelingan bo‘lib, hozirda ulardan ko‘chat yetishtirish ishlari olib borilmoqda.

 

Bundan tashqari, O‘rmon agentligi va Xitoyning “Sinoway Forest” kompaniyasi hamkorligida amalga oshirilayotgan “Zararli uglerodlarni yutuvchi o‘rmon xo‘jaligini rivojlantirish va ekotizimlarni tiklash” loyihasi doirasida Surxondaryo viloyatida 5 ming gektar maydonda pistazorlar barpo etish ishlari davom etmoqda.