Toshkentda Kichik halqa avtomobil yo‘lining bir qismida harakat vaqtincha cheklanadi
KHAYning Chilonzor tumanidan o‘tgan qismida transport harakati 19-iyun soat 23:00 dan 22-iyun soat 06:00 gacha cheklanadi.
Toshkent shahrida Kichik halqa avtomobil yo‘lining Chilonzor tumanidan o‘tgan qismida qurilish-montaj ishlari olib borilishi munosabati bilan transport vositalari harakati vaqtincha cheklanadi. Bu haqda Toshkent shahar YHTEM xabar berdi.
Ma’lum qilinishicha, cheklovlar 2026-yil 19-iyun soat 23:00 dan 22-iyun soat 06:00 gacha Kichik halqa avtomobil yo‘lining Toshkent davlat pedagogika universiteti oldidan Dilxush 2-tor ko‘chasi kesishmasigacha bo‘lgan qismida amal qiladi.
Ushbu davrda mazkur yo‘nalish bo‘ylab harakatlanadigan avtobuslar va boshqa transport vositalari belgilangan aylanma yo‘nalishlar orqali tashkil etiladi.
Mas’ul idoralar haydovchilardan yuzaga kelishi mumkin bo‘lgan noqulayliklar uchun uzr so‘rab, harakat yo‘nalishlarini oldindan rejalashtirishni tavsiya qildi.
