Toshkentda kuchli jala sabab ayrim ko‘chalarda suv to‘plandi
Toshkent shahar hokimligi kuchli jala oqibatlari bo‘yicha ma’lumot berdi.
Toshkent shahrida kuzatilgan kuchli jala va dovul oqibatida ayrim ko‘cha hamda yo‘llarda vaqtinchalik suv to‘planishi holatlari yuz berdi. Bu haqda poytaxt hokimligi ma’lum qildi.
Qayd etilishicha, hodisa yuzaga kelgan ilk daqiqalardan boshlab barcha tegishli kommunal va maxsus xizmatlar kuchaytirilgan tartibda ish olib borgan. Suv bosgan hududlarda suvni chetlatish, yomg‘ir suvi oqova va drenaj tarmoqlarini tozalash, shuningdek, transport va piyodalar harakati xavfsizligini ta’minlash bo‘yicha zarur choralar ko‘rilgan.
Hokimlik ma’lumotiga ko‘ra, hozirgi vaqtda suv to‘planishi bilan bog‘liq asosiy holatlar bartaraf etilgan. Shu bilan birga, mas’ul xizmatlar vaziyatni monitoring qilishda davom etmoqda va zarurat tug‘ilganda qo‘shimcha choralar ko‘riladi.
Ta’kidlanishicha, yuzaga kelgan holatlar kuchli jala va dovul bilan bog‘liq tabiiy omillar oqibatidir. Poytaxt aholisi va mehmonlaridan ehtiyotkor bo‘lish hamda o‘zlari va mol-mulklarini asrash so‘ralgan.
