Aleksandr Fedin yaratgan o‘rmonzor "Dendrologiya bog‘i"ga aylantiriladi
“Oqtepa” suv ombori hududidagi noyob bioxilma-xillik maskani davlat himoyasiga olinadi.
Prezidentning ekologiya masalalari bo‘yicha maslahatchisi, Ekologiya va iqlim o‘zgarishi milliy qo‘mitasi raisi Aziz Abduhakimov Aleksandr Fedin bilan uchrashib, uning ko‘p yillik mehnati natijasida barpo etilgan hududni ko‘zdan kechirgan.
Muloqot chog‘ida Aleksandr Fedin davlat himoyasida ekanligi, shuningdek, Ekologiya qo‘mitasi tizimidagi O‘rmon agentligiga ishga qabul qilinishi ma’lum qilingan.
Ta’kidlanishicha, “Oqtepa” suv ombori hududidagi uzoq yillar davomida shakllangan noyob daraxtzor, yovvoyi hayvonlar, qushlar va boshqa bioxilma-xillik obyektlari mavjud bo‘lgan yer maydonida “Dendrologiya bog‘i” barpo etiladi.
Shuningdek, Aleksandr Fedinning tabiatni asrash yo‘lidagi ko‘p yillik mehnati va ijtimoiy holati inobatga olinib, bog‘ hududida barcha zarur qulayliklarga ega bo‘lgan kichik uy-joy quriladi. Bog‘ xodimlari uchun ham zarur sharoitlar yaratiladi, jumladan, ular xizmat faoliyati uchun kvadrosikllar bilan ta’minlanadi.
