“Boʻyim uzun emas, ammo kerakli joyda boʻlishni bilaman” — Abbosbek Fayzullayev
Futbolchi Kolumbiya darvozasiga urgan goli haqida gapirib, oʻzini tarixga kirgan baxtli inson deb his qilishini aytdi.
Oʻzbekiston milliy terma jamoasi a'zosi Abbosbek Fayzullayev Kolumbiya darvozasiga kiritgan goli va bosh bilan oʻynashdagi uslubi haqida fikr bildirib, oʻsha vaziyatda omad ham muhim rol oʻynaganini taʼkidladi.
Futbolchining aytishicha, toʻpning aynan oʻzi turgan nuqtaga kelib qolishi qanchalik omad boʻlmasin, kerakli vaqtda kerakli joyda boʻlish ham katta ahamiyatga ega.
— Oʻsha payt toʻpning kelib qolgani ham balki omaddir, bilmayman. Oʻzimni baxtli inson deb his qilaman. Axir, tarixga kirganimning oʻzi katta baxt. Oʻzimni bosh bilan juda yaxshi oʻynaydigan futbolchi deb ayta olmayman. Lekin kerakli vaziyatda, kerakli joyda boʻlishim koʻp yordam beradi, — degan Fayzullayev.
Uning taʼkidlashicha, bosh bilan samarali oʻynash uchun faqat boʻy yetarli emas, balki toʻgʻri pozitsiya tanlash ham muhim omil hisoblanadi.
— Boʻyim baland emas, himoyachilardan ustun tomonim yoʻq. Shu sababli juda koʻp futbol tomosha qilaman. Deyarli hech bir uchrashuvni oʻtkazib yubormaslikka harakat qilaman. Hujumchilarning qayerga va qachon yugurishini kuzataman, oʻrganaman. Bu ham katta yordam beradi, — deya ta'kidlagan futbolchi.
Fayzullayevning fikricha, boʻyi pastligi baʼzan uning foydasiga ham ishlaydi.
— Himoyachilar mendan bosh bilan zarba chiqishini har doim ham kutishmaydi. Balki bu jihatning oʻziga yarasha afzalligi bordir. Eng muhimi — toʻgʻri joyni tanlash va oʻsha yerda vaqtida paydo boʻlish, — degan u.
