Xorijdagi nufuzli oliygohlarni tugatganlar maoshiga qo‘shimcha ustama to‘lanadi
Qo‘shimcha to‘lovlar bakalavriat, magistratura va PhD darajalariga ega mutaxassislar uchun belgilangan bo‘lib, uch yilgacha muddat davomida ajratiladi.
O‘zbekistonda nodavlat notijorat tashkilotlari (NNT) sohasida faoliyat yuritayotgan yosh va istiqbolli kadrlarni qo‘llab-quvvatlashning yangi mexanizmi joriy etilmoqda. Bu haqda Oliy ta’lim, fan va innovatsiyalar vazirligi ma'lum qildi.
Mazkur tartib “O‘zbekiston — 2030” strategiyasini “Mahallani rivojlantirish va jamiyatni yuksaltirish yili”da amalga oshirishga oid davlat dasturining 260-bandi asosida yo‘lga qo‘yiladi.
Unga ko‘ra, TOP–200 va TOP–500 xalqaro reytingdagi xorijiy oliy ta’lim muassasalarini tamomlab, NNTlarda faoliyat yuritayotgan yosh mutaxassislarga lavozim maoshiga qo‘shimcha ustamalar to‘lanadi.
Qo‘shimcha to‘lovlar bakalavriat, magistratura va PhD darajalariga ega mutaxassislar uchun belgilangan bo‘lib, uch yilgacha muddat davomida ajratiladi.
Top 200 xalqaro reytingdagi OTMni bitirgan yosh mutaxassisga:
- bakalavriat uchun BHMning 7 baravari (2 mln 884 ming so‘m),
- magistratura uchun BHMning 10 baravari (4 mln 120 ming so‘m),
- PhD yoki unga tenglashtirilgan ilmiy daraja uchun BHMning 15 baravari (6 mln 185 ming so‘m) miqdorida ustama to‘lanadi.
Top 500 xalqaro reytingdagi OTMni bitirgan yosh mutaxassisga:
- bakalavriat uchun BHMning 5 baravari (2 mln 60 ming so‘m),
- magistratura uchun BHMning 7 baravari (2 mln 884 ming so‘m),
- PhD yoki unga tenglashtirilgan ilmiy daraja uchun BHMning 10 baravari (4 mln 120 ming so‘m) miqdorida ustama to‘lanadi.
Yosh mutaxassis ustamaning faqat bitta turidan30 yoshgacha foydalanadi. Ustama olish uchun arizalar www.ngo.uz platformasi orqali qabul qilinadi.
