O‘zbekiston yosh metrologlari xalqaro tanlovda sovrinli o‘rinlarni egalladi
Sankt-Peterburgda o‘tgan MDHning eng yaxshi yosh metrologi tanlovida O'zbekiston vakillari I va II o‘rinlarni qo‘lga kiritdi.
Joriy yil 16–17-iyun kunlari Rossiya Federatsiyasining Sankt-Peterburg shahrida “KELAJAK BIZNIKI” (“ЗА НАМИ БУДУЩЕЕ”) shiori ostida IV Xalqaro ilmiy-amaliy yosh olimlar va mutaxassislar anjumani bo‘lib o‘tdi.
Mazkur anjuman doirasida o‘tkazilgan “MDHning eng yaxshi yosh metrologi” I Xalqaro tanlovida MDHga a’zo davlatlardan 40 nafar yosh mutaxassis ishtirok etdi.
Tanlov davomida ishtirokchilar metrologiyaning ilmiy, amaliy hamda raqamlashtirish yo‘nalishlari bo‘yicha topshiriqlarni bajarib, o‘z bilim va ko‘nikmalarini, shuningdek, innovatsion loyihalarini taqdim etdilar.
Quvonarlisi, tanlov yakunlariga ko‘ra O‘zbekiston nomidan ishtirok etgan O‘zMMI xodimlari sovrinli o‘rinlarni egalladi.
Xususan, ilmiy metrologiya yo‘nalishida Taubaldiyev Azamat faxrli I o‘rinni, metrologiyani raqamlashtirish yo‘nalishida esa Muxammad Aminov Axmadbek II o‘rinni qo‘lga kiritdi.
Mazkur natijalar yosh mutaxassislarning yuqori ilmiy salohiyati, kasbiy tayyorgarligi hamda mamlakatimizda metrologiya sohasida yosh kadrlarni qo‘llab-quvvatlash borasida amalga oshirilayotgan tizimli ishlarning amaliy ifodasidir.
