O‘zbekistonda xorijiy fuqarolar ham davlat ijtimoiy sug‘urtasi tizimidan foydalanishi mumkin
Homiladorlik va tug‘ish nafaqasini olish uchun ixtiyoriy sug‘urta tizimida kamida 10 oy davomida sug‘urta badallari to‘langan bo‘lishi talab etiladi.
“Davlat ijtimoiy sug‘urtasi to‘g‘risida”gi Qonunning 5-moddasiga muvofiq, ayrim toifadagi xorijiy fuqarolar ham davlat ijtimoiy sug‘urtasi tizimida ishtirok etish huquqiga ega. Bu haqda Ijtimoiy himoya milliy agentligi bosh mutaxassisi Dilshodxon Muxamedjanova Zamon.uz’ga ma’lum qildi.
Xususan, O‘zbekiston Respublikasida mehnat faoliyatini amalga oshirayotgan xorijiy fuqarolar, agar O‘zbekiston Respublikasi va ularning fuqaroligi mansub bo‘lgan davlat o‘rtasida ijtimoiy ta’minot sohasida xalqaro shartnoma mavjud bo‘lsa, ushbu shartnoma shartlariga muvofiq davlat ijtimoiy sug‘urtasi tizimidan foydalanishi mumkin.
Agar bunday xalqaro shartnoma mavjud bo‘lmasa, xorijiy fuqarolar davlat ijtimoiy sug‘urtasi tizimida “Davlat ijtimoiy sug‘urtasi to‘g‘risida”gi Qonuniga muvofiq ixtiyoriy ravishda ishtirok etishlari mumkin. Buning uchun ular “Baraka” mobil ilovasi orqali ro‘yxatdan o‘tib, ixtiyoriy sug‘urta badallarini to‘lab boradilar.
“Bugungi kunda ixtiyoriy sug‘urta badalining eng kam miqdori mehnatga haq to‘lashning eng kam miqdorining 5 foizini tashkil etadi va bugungi belgilangan miqdor bilan bu 63 550 so‘mni tashkil qilyapti. Ushbu sug‘urta badallarini oyma-oy to‘lab borish natijasida belgilangan sug‘urta stajiga ega bo‘lgan xorijiy fuqarolar o‘rnatilgan tartibda nafaqalarni olishlari mumkin bo‘ladi”, deydi mutaxassis.
Ixtiyoriy sug‘urta badallarini belgilangan tartibda to‘lab borgan xorijiy fuqarolar zarur sug‘urta stajini shakllantirgan taqdirda davlat ijtimoiy sug‘urtasi tizimi doirasidagi tegishli nafaqalarni olish huquqiga ega bo‘ladilar.
Masalan, homiladorlik va tug‘ish nafaqasini olish uchun ixtiyoriy sug‘urta tizimida kamida 10 oy davomida sug‘urta badallari to‘langan bo‘lishi talab etiladi. Sug‘urta hodisasi yuz berganda nafaqa Davlat ijtimoiy sug‘urta jamg‘armasi tomonidan qonunchilikda belgilangan tartibda tayinlanadi va to‘lanadi.
Mutaxassislarning ta’kidlashicha, “Baraka” mobil ilovasi foydalanuvchilarga qulaylik yaratish maqsadida bir necha tillarda faoliyat yuritadi.
