O‘zbekistonda xususiy kasbiy ta’lim markazlari soni to‘rt baravar oshiriladi

 

Prezident Shavkat Mirziyoyev xususiy kasbiy ta’limni rivojlantirishga oid chora-tadbirlar yuzasidan taqdimot bilan tanishdi.

 

Taqdimotda kasbiy ta’lim xizmatlarini ko‘rsatishda xususiy sektor imkoniyatlarini kengaytirishga qaratilgan yangi chora-tadbirlar muhokama qilindi.

 

Qayd etilishicha, kelgusi uch yilda xususiy sektor ulushini oshirish orqali xalqaro standartlar asosida faoliyat yuritadigan o‘quv va baholash markazlari sonini 50 tadan 200 taga yetkazish, shuningdek, har yili 500 ming nafar aholini xususiy kasbiy ta’lim bilan qamrab olish maqsad qilingan. Ayni paytda bu ko‘rsatkich 45 ming nafarni tashkil etadi.

 

Shu bilan birga, 300 dan ortiq o‘quv dasturlari qayta ko‘rib chiqilib, xalqaro talablarga moslashtiriladi, kamida 1 ming nafar o‘qituvchi va ta’lim ustalarining malakasi oshiriladi.

 

Dasturlarni moliyalashtirish uchun Bandlik jamg‘armasidan 500 milliard so‘m yo‘naltirilishi rejalashtirilgan.

 

Tadbirkorlar bilan uchrashuvlarda bildirilgan taklif va muammolar ham ko‘rib chiqilib, xususiy kasbiy ta’lim markazlari uchun bojxona boji va ijtimoiy soliq bo‘yicha imtiyozlar, imtiyozli kreditlar hamda ayrim xarajatlarni kompensatsiya qilish mexanizmlarini joriy etish masalalari muhokama qilindi.

 

Shuningdek, xorijiy mutaxassislarni jalb qilish xarajatlarini qoplash, malaka sertifikatlash tizimini rivojlantirish hamda kasbiy ta’lim infratuzilmasini kengaytirish bo‘yicha qo‘shimcha qo‘llab-quvvatlash choralari taklif etildi.

 

Xususiy kasbiy ta’lim tashkilotlarini rivojlantirish maqsadida yil yakunigacha jihozlash dasturiga 100 million dollar jalb qilinishi, bitiruvchilar loyihalarini qo‘llab-quvvatlash uchun “Venchur jamg‘armasi” tashkil etilishi hamda “kasb vaucheri” dasturi doirasida har yili mablag‘ ajratib borilishi rejalashtirilgan.

 

Shu bilan birga, “Ko‘nikmalar parki” ekotizimini yaratish va soha muammolarini tezkor hal etish uchun raqamli muloqot platformasini yo‘lga qo‘yish masalalari ham ko‘rib chiqildi.

 

Prezident taqdim etilgan chora-tadbirlarni ma’qullab, mas’ullarga kasbiy ta’lim tizimini rivojlantirish va uni xalqaro standartlarga moslashtirish bo‘yicha aniq topshiriqlar berdi.