O'zbekistonliklar Vetnamga kirishning yangi qoidalari haqida ogohlantirildi
Yangi tartibga ko‘ra, yo'lovchilardan mamlakatga kirishdan kamida 72 soat oldin maxsus elektron shaklni to‘ldirish talab etiladi.
Vetnam Sotsialistik Respublikasi Immigratsiya xizmati mamlakatga kiruvchi barcha xorijiy fuqarolar uchun majburiy elektron ro‘yxatdan o‘tish tizimini (Pre-Arrival Information) joriy etdi. Bu haqda Uzbekistan Airways matbuot xizmati ma’lum qildi.
Qayd etilishicha, yangi tartib 2026-yil 22-iyundan kuchga kiradi va 23-iyundan boshlab Uzbekistan Airways’ning HY561 reysi bilan Vetnamga yo‘l oluvchi yo‘lovchilarga ham tatbiq etiladi.
Yangi talablarga ko‘ra, Vetnamga safar qilayotgan xorijiy fuqarolar mamlakatga yetib borishdan kamida 72 soat oldin maxsus elektron shaklni to‘ldirishi shart. Buning uchun yo‘lovchilar Vetnam Immigratsiya xizmati tomonidan ishga tushirilgan rasmiy portal — prearrival.immigration.gov.vn orqali ro‘yxatdan o‘tishlari lozim.
Ariza muvaffaqiyatli rasmiylashtirilgach, yo‘lovchiga QR-kod taqdim etiladi. Mazkur QR-kod chegaradan o‘tish vaqtida taqdim etilishi uchun smartfonda saqlab qo‘yilishi yoki qog‘ozga chop etilishi tavsiya etiladi.
Uzbekistan Airways Vetnamga safar qilishni rejalashtirayotgan fuqarolardan yangi talablarni oldindan bajarish va hujjatlarni o‘z vaqtida rasmiylashtirishni so‘radi.
