PMI kompaniyasining xalqaro va mintaqaviy mutaxassislari bilan uchrashuv o‘tkazildi
Uchrashuvda yashirin iqtisodiyot hajmini qisqartirish va noqonuniy tamaki savdosiga qarshi kurashishda hamkorlikni kengaytirish masalalari muhokama qilindi.
Bosh prokuratura huzuridagi Departament hamda Alkogol va tamaki bozorini tartibga solish inspeksiyasi vakillari tomonidan “Philip Morris International” (PMI) xalqaro kompaniyasi mutaxassislari bilan uchrashuv o‘tkazildi.
Uchrashuvda yashirin iqtisodiyot hajmini kamaytirish hamda tamaki va nikotin mahsulotlarining noqonuniy savdosini cheklash va oldini olish borasida o‘zaro tajriba almashish hamda ikki tomonlama hamkorlikni mustahkamlash masalalari yuzasidan fikr almashindi.
Tadbirda kompaniyaning xalqaro va mintaqaviy mutaxassislari tomonidan tamaki mahsulotlarining noqonuniy savdosiga qarshi kurashish sohasida amalga oshirilayotgan chora-tadbirlar to‘g‘risida ma’lumotlar taqdim etildi.
Shuningdek, Departament va Inspeksiya vakillari tomonidan quyidagi yo‘nalishlarda taqdimotlar qilindi:
- kontrabanda va uyushgan sxemalarni aniqlash;
- xavf-xatarlarni tahlil qilish va yetkazib berishni kuzatish;
- shubhali mahsulotlarni aniqlash vositalari va kriminalistik ekspertiza;
- xalqaro tergov va mintaqaviy huquqni qo‘llash amaliyoti;
- biznes va huquq-tartibot organlari o‘rtasida tajriba almashish.
Uchrashuv do‘stona muloqot tarzida o‘tkazildi hamda qayd etilgan masalalar bo‘yicha xalqaro hamkorlikni belgilangan tartibda amalga oshirishga kelishib olindi.
