AQSh Milliy razvedka tizimida ommaviy ishdan bo‘shatishlar boshlandi

 

AQSh Milliy razvedka boshqarmasi tizimida keng ko‘lamli xodimlarni qisqartirish jarayoni boshlandi. Bu haqda CNN telekanali manbalarga tayanib xabar berdi.

 

Ma’lumotlarga ko‘ra, Milliy razvedka direktori vazifasini bajaruvchi Bill Pulte tomonidan boshlangan qisqartirishlar Milliy razvedka direktori idorasidagi yuzlab lavozimlarga ta’sir qilishi mumkin. Shuningdek, Milliy aksilterrorizm markazi hamda Milliy aksilrazvedka va xavfsizlik markazi eng ko‘p qisqartirishlar kutilayotgan tuzilmalar qatoriga kiradi.

 

Mazkur o‘zgarishlar AQSh Kongressidagi demokrat qonunchilar orasida xavotir uyg‘otdi. Senat va Vakillar palatasining razvedka qo‘mitalari a’zolari Mark Uorner va Jim Xayms Bill Pultega murojaat yo‘llab, bunday qisqartirishlar milliy xavfsizlikka salbiy ta’sir ko‘rsatishi mumkinligini ta’kidladilar. Ular, shuningdek, bunday qarorlarni amalga oshirishda Kongress roziligi zarurligini eslatib o‘tgan.

 

Oq uy esa AQSh prezidenti Donald Trampning Truth Social platformasidagi bayonotiga ishora qilib, qisqartirishlar davlat idoralari faoliyatini optimallashtirish va samaradorligini oshirishga qaratilganini ma’lum qilgan.

 

Bill Pulte iyun oyi boshida Milliy razvedka direktori vazifasini bajaruvchi etib tayinlangan edi. Bungacha u Federal uy-joy moliyalashtirish agentligiga rahbarlik qilgan. OAV ma’lumotlariga ko‘ra, uning razvedka va milliy xavfsizlik sohasida avvalgi tajribasi bo‘lmagan.