O‘zbekistonda 1,5 milliondan ortiq talaba tahsil olmoqda, ularning aksariyati qizlar — Saida Mirziyoyeva
Prezident administratsiyasi rahbari qizlarning ta’lim olishi jamiyat taraqqiyotining muhim omili ekanini ta’kidladi.
Prezident administratsiyasi rahbari Saida Mirziyoyeva mamlakatda qizlarning ta’lim olish imkoniyatlari tobora kengayib borayotgani va bu boradagi islohotlar o‘z samarasini berayotganini ta’kidladi.
Qayd etilishicha, bugungi kunda O‘zbekiston oliy ta’lim muassasalarida 1,5 milliondan ortiq talaba tahsil olmoqda. Ularning yarmidan ko‘pini qizlar tashkil etmoqda. Bu esa Prezident tashabbusi bilan ta’lim sohasida amalga oshirilayotgan keng ko‘lamli islohotlar natijasi ekani qayd etildi.
Saida Mirziyoyeva minglab oilalar qiz farzandlarining ta’lim olishi va kasb egallashiga ishonch bildirayotganini, qizlar esa o‘zlari qiziqqan yo‘nalishlarda tahsil olib, izlanishlar bilan shug‘ullanayotganini ta’kidladi.
Shuningdek, u bilimli qiz nafaqat o‘z hayotini, balki oilasi, atrofidagi muhit va butun mamlakat kelajagini o‘zgartirishga qodir ekanini qayd etdi.
Saida Mirziyoyeva ta’lim insonning hayot yo‘lini mustaqil tanlashi uchun kuch va erkinlik berishini ta’kidlab, qizlarning o‘z orzulari sari dadil qadam tashlashlari uchun zarur sharoit va imkoniyatlarni yaratish muhimligini qayd etdi.
