Qoraqalpog‘istonda fuqaro kredit qarzi sabab mashinasidan ayrildi
Taxiatoshda qarzdorning “JETOUR” avtomashinasi bank balansiga o‘tib ketdi.
Majburiy ijro byurosi Qoraqalpog‘iston Respublikasi boshqarmasi ish yurituvida bo‘lgan, Fuqarolik ishlari bo‘yicha Chimboy tumanlararo sudining ijro hujjatiga asosan qarzdor A.S.dan ATB “Biznesni rivojlantirish banki” Nukus filiali foydasiga 388 mln so‘m undirish belgilangan.
Bo‘lim davlat ijrochilari tomonidan qarzdorga ijro hujjati ijrosini taʼminlash uchun 15 kunlik ixtiyoriy muddat berilgan va unga tegishli JETOUR X90 PLUS rusumli avtomashina tegishli tartibda xatlab qo‘yilgan.
Shunga qaramasdan, qarzdor tomonidan ijro hujjati talabi ixtiyoriy ravishda bajarilmaganligi sababli, xatlangan avtomobil elektron onlayn-auksion savdo maydonchasi orqali sotuvga chiqarilgan.
Joriy yilning iyun oyida o‘tkazilgan auksion savdolarida sotuvga chiqarilgan avtomobilga xaridor topilmaganligi sababli ushbu mulk qarzdorlik evaziga ATB “Biznesni rivojlantirish banki” balansiga o‘tkazib berilgan.
