Davlat idoralaridagi komplayens tuzilmalari himoyasi kuchaytiriladi
Komplayens xodimlariga nisbatan jinoyat ishi faqat Bosh prokuror tomonidan qo‘zg‘atilishi belgilandi.
Prezident tomonidan 22-iyun kuni imzolangan qonun bilan davlat organlari va tashkilotlarida faoliyat yuritayotgan komplayens xizmatlarining xavfsiz kafolatlariga qaratilgan yangi normalar joriy etildi.
Qonunga muvofiq, komplayens tuzilmalari xodimlari endilikda tegishli tashkilotlarning obyektlariga to‘sqinliksiz kirish, o‘z faoliyatini amalga oshirish uchun zarur bo‘lgan hujjatlar va axborotlar bilan tanishish, shuningdek, aniqlangan korrupsiyaviy holatlar yuzasidan taqdimnomalar kiritish vakolatiga ega bo‘ladi.
Shuningdek, davlat organi yoki tashkilotining birinchi rahbarida korrupsiyaga oid huquqbuzarlik alomatlari aniqlangan yoxud uni jinoiy guruh faoliyatiga rahnamolik qilayotgan deb hisoblash uchun yetarli asoslar mavjud bo‘lgan taqdirda, komplayens bo‘yicha mas’ul o‘rinbosarga yuqori turuvchi komplayens xizmati bilan kelishilgan holda tegishli hujjatlar va ma’lumotlarni huquqni muhofaza qiluvchi organlarga bevosita taqdim etish vakolati berildi.
Qonun bilan komplayens tuzilmalari xodimlarining huquqiy himoyasi ham kuchaytirildi. Xususan, ularga nisbatan jinoyat ishi faqat Bosh prokurori tomonidan qo‘zg‘atilishi mumkinligi belgilandi.
Mazkur yangiliklar davlat organlari va tashkilotlarida korrupsiyaga qarshi ichki nazorat tizimining mustaqilligi va ta’sirchanligini oshirish, komplayens xizmatlari faoliyati uchun qo‘shimcha huquqiy kafolatlar yaratish hamda korrupsiyaga qarshi kurashish mexanizmlarini yanada takomillashtirishga xizmat qiladi.
