AQSH Quvayt va Saudiya Arabistonidagi harbiy bazalarini ko'chirishi mumkin — WSJ
Pentagon ayrim harbiy obyektlarni Eron raketalari yetib bormaydigan hududlarga ko‘chirish variantini muhokama qilmoqda.
AQSh Yaqin Sharqdagi ayrim harbiy bazalarini Eron raketa va dronlari tahdididan uzoqroq hududlarga ko‘chirish imkoniyatini muhokama qilmoqda. Bu haqda The Wall Street Journal (WSJ) manbalarga tayanib xabar berdi.
Nashrga ko‘ra, Pentagon Bahrayndagi harbiy bazani modernizatsiya qilish, shuningdek, Quvayt va Saudiya Arabistonidagi Amerika harbiy ishtirokini qisqartirish masalasini ko‘rib chiqmoqda. Rejalarga muvofiq, ayrim bazalar yoki ularning funksiyalarini Eron zarba vositalari yetib bormaydigan g‘arbiy hududlarga ko‘chirish ehtimoli ham o‘rganilmoqda.
WSJ ma’lumotiga ko‘ra, ko‘rib chiqilayotgan variantlardan biri Isroil bo‘lib, u yerda mojaro davrida AQShning qiruvchi samolyotlari va yonilg‘i quyuvchi havo kemalari joylashtirilgan.
Nashrning yozishicha, AQSh mintaqadagi ayrim harbiy obyektlarga yetkazilgan zarar ko‘lamini oshkor qilmagan. Xususan, Bahrayndagi AQSh Harbiy-dengiz kuchlarining Naval Support Activity Bahrain bazasi bir necha bor hujumga uchragan. Oqibatda qo‘mondonlik binolari, aloqa terminallari va boshqa inshootlarga jiddiy zarar yetgani aytilmoqda.
Shuningdek, mintaqadagi harbiy va diplomatik obyektlarni o‘z ichiga olgan kamida 20 ta Amerika obyektiga zarbalar berilgani qayd etilgan. Ayrim inshootlar qayta tiklanmasligi mumkinligi, qo‘mondonlik markazlarini esa yer ostiga ko‘chirish masalasi ham muhokama qilinayotgani ta’kidlangan.
Nashr eslatishicha, 21-iyun kuni AQSh va Eron vakillari Qatar hamda Pokiston vositachiligida Shveysariyaning Burgenstok shahrida muzokaralar o‘tkazgan. Tomonlar uchrashuvni konstruktiv ruhda o‘tganini bildirib, keyingi texnik muzokaralar uchun zamin yaratilganini ma’lum qilgan.
