AQSH sudi Epshteyn sheriklarining ismlarini oshkor etishni talab qildi
Agar Adliya vazirligi bu talabni bajarmasa, sudga har bir hujjat yoki uning yopib qo‘yilgan qismi nima sababdan maxfiy saqlanishi lozimligini alohida asoslab berishi shart.
AQSH federal sudi Adliya vazirligiga mojaroli moliyachi Jeffri Epshteyn ishi bo‘yicha ayrim hujjatlarni, jumladan, uning ehtimoliy sheriklari ismlarini oshkor etish yoki hujjatlardagi maxfiylashtirilgan har bir qism nima sababdan yopib qo‘yilganini qonuniy jihatdan asoslab berishni buyurdi. Bu haqda RIA Novosti tanishib chiqqan sud hujjatida keltirilgan.
Ma’lum qilinishicha, 2026-yil aprel oyida jurnalist Keti Pang AQSH Adliya vazirligi va bosh prokuror vazifasini bajaruvchi Todd Blansh ustidan sudga da’vo arizasi kiritgan. U vazirlikni Epshteynning ehtimoliy sheriklari ismlarini yashirgani hamda ish hujjatlarining katta qismini asossiz ravishda maxfiylashtirgani uchun ayblagan.
Sud qaroriga ko‘ra, Adliya vazirligi 2-iyulga qadar jo‘natuvchi va qabul qiluvchilarning to‘liq ismlari ko‘rsatilgan sakkizta xatni, ehtimoliy sheriklar ismlari qayd etilgan ikkita hujjatni, Federal qidiruv byurosining to‘rtta hisobotiga oid dastlabki xizmat qaydlarini, shuningdek, xorijdan olingan materiallarni e’lon qilishi kerak.
Agar vazirlik bu talabni bajarmasa, sudga har bir hujjat yoki uning yopib qo‘yilgan qismi nima sababdan maxfiy saqlanishi lozimligini alohida asoslab berishi shart.
Bundan tashqari, Adliya vazirligi federal reyestrda hujjatlardagi barcha maxfiylashtirilgan qismlar ro‘yxatini e’lon qilishi hamda Epshteyn ishi bo‘yicha yangi materiallar oshkor qilingan sari ushbu ro‘yxatni muntazam yangilab borishi lozim.
Eslatib o‘tamiz, 2019-yilda Jeffri Epshteynga AQSHda voyaga yetmaganlarni jinsiy ekspluatatsiya qilish maqsadida odam savdosi bilan shug‘ullanganlik ayblovi qo‘yilgandi. U o‘sha yil iyul oyida qamoqxonada vafot etgan. Tergov uning o‘z joniga qasd qilgani haqida xulosa chiqargan.
AQSH bosh prokurori o‘rinbosari (hozirda bosh prokuror vazifasini bajaruvchi) Todd Blansh joriy yil 30-yanvar kuni Epshteyn ishi bo‘yicha hujjatlarni e’lon qilish jarayoni yakunlanganini ma’lum qilgan.
Ochiqlangan materiallar hajmi 3,5 milliondan ortiq faylni tashkil etadi.
