Jizzaxda elektrdan qarzdorlik sabab avtomashina xatlandi
Viloyatda kommunal qarzdorliklar MIB orqali undirilmoqda.
Majburiy ijro byurosining Paxtakor tuman bo‘limi ish yurituvida bo‘lgan ijro hujjatiga asosan, qarzdor K.S.dan elektr tarmoqlari korxonasi foydasiga mavjud qarzdorlikni undirish belgilangan edi.
Ijro hujjati talablarini taʼminlash maqsadida Byuro xodimlari tomonidan qarzdorning moliyaviy majburiyatlarini bajarishi yuzasidan tegishli ijro harakatlari amalga oshirildi.
O‘rganishlar davomida qarzdorga tegishli avtomashina aniqlanib, qonunchilikda belgilangan tartibda mazkur transport vositasi xatlovga olingan.
Ushbu chora qarzdorlikni undirish, sud hujjati ijrosini taʼminlash hamda undiruvchining qonuniy manfaatlarini himoya qilish maqsadida amalga oshirildi.
